Match bastala salysymen «Marsel» shabýylǵa shyǵyp, gol soǵyp kete jazdady. Osyǵan qarap Dıego Sımıone qarsylastyń qarymdy ekeninen sekem alyp qaldy. Biraq «Olımpık» qatelik jasap, Antýan Grızmandy qaqpashymen betpe-bet qaldyrdy. Antýan mundaı tustan eshqashan múlt ketpegen. Al ekinshi taımda «Atletıko» ekinshi shabýylyn jasap, Grızman ekinshi golyn soqty. Oıyn ótken jerden 70 shaqyrym jerde týyp-ósken Antýan týǵan jerdiń topyraǵyna kelip, atoı saldy. Fınaldyq oıynda eki gol soqqan 9-fýtbolshy bolyp tirkeldi. Ázirge Eýropa lıgasynyń fınalynda 3 gol soqqan fýtbolshy joq.
Oıynnyń 89-mınýtynda Gabı qarymta shabýyl kezinde esepti 3:0-ge jetkizdi de, matchtyń núktesin qoıdy. «Atletıko» sońǵy 9 jylda 3 márte Eýropa lıgasyn jeńdi. Gabıden bólek, Dıego Godın, Koke men Hýanfran barlyǵy Eýropa lıgasyn «Atletıkomen» ekinshi márte jeńdi. Al jalpy alǵanda, Eýropa lıgasynyń sońǵy 9 fınalynyń 6-yn ıspan klýbtary utypty. Úsh ret «Atletıko», úsh ret «Sevılıa». Sondyqtan da qazir eýropalyq baspasóz bul týrnırdi ıspan klýbtarynyń jekemenshik jarysy dep te jazyp júr. Bálkim, keler jyly bul úrdis úziletin de shyǵar, sebebi London qalasynyń eki birdeı alpaýyt klýbtary – «Arsenal» men «Chelsı» Eýropa lıgasynda óner kórsetetin boldy.
Sonymen «Atletıko» úshinshi ret kýbok ıegeri atanyp, bul jaǵynan «Lıverpýl», «Inter» jáne «Iýventýs» klýbtarynyń kórsetkishimen teńesti. Osy jarysta eń kóp jeńgen ázirge «Sevılıa» ǵana (5).
Sonymen qatar jankúıerler úshin jarys jeńimpazyna beriletin syıaqy da qyzyq bolar. «Atletıko» «Astana» sekildi toptyq kezeńde óner kórsetkeni úshin 16,3 mıllıon eýro aldy. Odan keıin shırek fınalǵa shyqqany úshin 1 mıllıon, jartylaı fınal úshin 1,6 mıllıon, al fınalda jeńiske jetkeni úshin 6,5 mıllıon eýroǵa qaryq boldy. Jalpy, somada ıspan klýby 26,6 mıllıon eýro tabysqa keneldi. Odan bólek ÝEFA klýbtarǵa televızııalyq reıtıng boıynsha da ústeme qarjy beredi. Bul soma sol eldiń klýbtaryna teńdeı bólinedi.
2017/2018 jylǵy maýsymnyń sońǵy núktesi 26 mamyr kúni Kıevte qoıylady. Chempıondar lıgasynyń fınalynda «Real» Madrıd pen «Lıverpýl» kezdesedi. Bir maýsymda eki eýrokýbok ta Ispanııa astanasyna jol tartýy ǵajap emes. Brıtanııalyq klýb bul jaǵdaıdy boldyrtpaımyz dep bilek sybanyp otyr. Degenmen býkmekerlik keńseler qazirgi tańda favorıt dep Zınedın Zıdan komandasyna bás tigip otyr. Árıne eki jyl qatarynan kýbokty ıemdengen ıspanııalyqtar tájirıbesi tolysqan, neshe túrli fınaldy kórgen tisqaqqan ujym. Alaıda «Lıverpýldiń» de tarıhy jutań emes.
Ermuhamed Máýlen,
«Egemen Qazaqstan»
